Sua Eselénsia Ministru Administrasaun Estatal konvoka Reuniaun Planu Investimentu Munisipal tinan 2027

Dili, 30 Janeiru 2026; Sua Eselénsia Ministru Administrasaun Estatal, Sr. Tomás do Rosário Cabral, konvoka reuniaun Planu Investimentu Munisipal tinan 2027 ho Prezidente Autoridade sira inklui Autoridade Administrativa Ataúro ne’ebe prezenta hosi Sekretária Administrasaun Finansas, Sra. Victoria da Costa Gomes inklui Sekretáriu Planeamentu Investimentu Dezenvolvimentu Integradu (PIDI), Sr. Vicente Sanches Soares, iha Salão INAP Comoro Dili.

Haree fila-fali ba lei Munisipiu, Munisipiu balu seidauk entrega prosesu aprovizionamentu. Planu aprovizionamentu tenke entrega ba Sua Eselénsia Ministru dentru de fulan janeiru atu bele halo aprovasaun.

Orsamentu ba Autoridade Administrativa Ataúro la iha problema maibe presiza ejekuta ho kuidadu no presiza mos ita hotu nia akompañamentu.
Sua Eselénsia Ministru Administrasaun Estatal mos husu Autoridade Administrativa Ataúro atu halo intervensaun ka hapara kompania Tinolina atu labele kee estraga foho iha Beloi, parte Usularan, tanba ita sa’e ro ka aviaun haree rai ne’e ladun diak. Alende ne’e Sua Eselénsia mos konvida PAM no SECAM sira atu vizita Ataúro.
Diretor servisu Autoridade Administrativa Ataúro ne’ebe partisipa iha reuniaun ne’e mak Diretor Ajensia Planeamentu, Diretor Servisu Obras Públika no Xefe Departamentu Serivsu Programa Nasional Dezenvolvimentu Suku (PNDS).