Diseminasaun Informasaun Pagamentu Dijitál

Diseminasaun Informasaun Pagamentu Dijitál ne’ebe fasilita hosi BCTL

Ataúro, 30 Agostu 2025; Exelensia Prezidente Autoridade Administrativa Ataúro, Sr. Mateus Belo abertura Diseminasaun Informasaun kona-ba Pagamentu Dijitál ne’ebe fasilita hosi  Banku Sentrál Timor-Leste (BCTL) iha Salão de Encontro MPC Ataúro.

Eventu ne’e ofisialmente abertura hosi Exelensia Prezidente Autoridade, Sr. Mateus Belo, iha ninia intervensaun, apresia Banku Centrál hodi lori inisiativa importante ida-ne’e mai Autoridade Administrativa Ataúro.

“Agradese tebes ba inisiativa hosi Banco Central hodi mai fahe Informasaun Pagamentu Dijitál ba emprezariu sira iha ne’e, hein katak liu hosi deziminasaun ida ne’e bele tulun emprezariu sira hodi komprende utilizasaun Pagamentu Dijitál”.

Sr. Andre da Costa, iha nia intervensaun hato’o katak:

• Pagamentu dijitál no servisu finanseiru sira aliña ho programa Governu atu promove Ekonomia dijitál.
• Programa ida-ne’e aliña ho Timor-Leste nia preparasaun atu adere ba ASEAN, ne’ebé presiza moderniza liu tan infraestrutura dijitál sira.
• Pagamentu dijitál hamenus kustu operasionál ba Banku Sentrál no banku komersiál sira – liuliu durante importasaun no distribuisaun osan notas –ho kustu ne’ebé boot.
• Nu’udar Katalizadór, Banku Sentrál kontinua lidera esforsu atu promove pagamentu dijitál iha sistema finanseiru Timór-Leste nian. Hanesan operador (servisu ho instituisaun finanseiru sira atu harii sistema sira ne’ebé presiza) no regulador (haree operasaun pagamentu dijitál sira), BCTL iha kompromisu atu asegura ekosistema pagamentu ida-ne’ebé seguru, modernu no efisiente ba nasaun ne’e.

Aprezentador sira sei ko’alia liu kona-ba sistema pagamentu dijitál no infraestrutura sira ne’ebé disponivel iha Timor-Leste, enkoraja partisipante sira atu envolve no husu pergunta hodi kompriende diak liu tan pagamentu dijitál

Espera katak, iha futuru, wanhira sidadaun sira hetan koñesimentu diak ona kona-ba pagamentu dijitál no servisu ne’ebé disponivel, ema hotu sei uza sistema pagamentu dijitál ba tranzasaun sira.

Exelénsia PAA-Ataúro Asina kontratu ho empreza lokal sira ba projetu PDIM 2025.

Ataúro-29 Jullu 2025; Exelénsia Prezidente Autoridade Administrativa Ataúro, Sr. Mateus Belo, selebra kontratu ho empreza lokal ne’ebe selesionadu ba konkursu Planeamentu Dezenvolvimentu Integradu Munisipal (PDIM) mak hanesan, empreza Realidade Salnes Unipessoal, Lda, empreza Cafiob II Unipessoal, Lda no empreza Cottonii Group, Lda ho projetu sira hanesan tuir mai:

1. Konstrusaun Postu Saude iha Meta Nau, Suku Biqueli ho Valor kontratu $ 214,499.01 sei kontrui husi Empreza Realidade Salnes Unipessoal, Lda
2. ⁠Konstrusaun Rezidensia Médiku iha Aldeia Anartuto, Suku Macadade ho valor kontratu $ 90,365.21 sei konstrui husi Empreza Realidade Salnes Unipessoal, LDA
3. ⁠Konstrusaun Rezidensia Professores iha Aldeia Atekru, Suku Beloi ho valor kontratu $ 69,942.23 sei kontrui husi Empreza Cafiob II Unipessoal, Lda
4. ⁠Konstrusaun Refeitoriu iha Vila Maumeta ho valor kontratu $ 63,067.77 sei konstrui husi Empreza Cottonii Group, Lda

Iha serimonia selebrasaun kontratu ne’e akompaña hosi Exelensia Prezidente Autoridade rasik, Diretor Edukasaun no Diretor Saúde hanesan nain ba projetu, Sekretátiu Administrasaun i Finansas, Diretor Aprovizionamentu ho ekipa, Xefe Departamentu Ajensia Planeamentu ho Enjineiru sira no Diretor Empreza lokal sira.

Deklarasaun Area La Soe Foer Arbiru (ALFA) iha Suku Vila Mau-meta.

Vila Mau-meta, Kuarta Feira, 25 Juñu 2025; Suku Vila Mau-meta ho ninia Aldeia tolu (3) mak hanesan Aldeia Eclae, Aldeia Ilimanu no Aldeia Ileticaraquia, ho total uma kain 492 ho populasaun 2149. Total deklara katak Komunidade Suku Vila Mau-meta livre ona hosi Area La Soe Foer Arbiru (ALFA), sei mantein nafatin no mellora diak liutan tuir posibilidade komunidade.

Xefe Departamento de Gestão de Programas de Saúde, Sra. Agustinha da Costa Gomes, kongratula komunidade Suku Vila Mau-meta tanba bele deklara ona ALFA.

“Parabéns ba ita hotu tanba bele deklara ona ALFA iha Suku Vila Mau-meta, parte Saúde kuandu soe foer arbiru, foer ne’ebe ita soe sei lori fali moras mai ita, tanba ne’e agradese ba ita hotu iha nia servisu hamutuk hodi deklara ALFA. Husu mos ba ita hotu atu kuidadu ita nia ambiente, tenke hamos ita nia uma hun sira par ba oin ita nia ambiente kontinua moos”.

Exelensia Prezidente Autoridade Administrativa Ataúro, Sr. Mateus Belo, felisita komunidade Suku Vila Mau-meta, tanba ida ne’e sai momentu importante.

“Momentu importante ba Suku Vila Mau-meta ne’ebe marka tan pasu ida hodi deklara ALFA, esforsu sira hotu la fasil, maibe ita nia servisu hamutuk no partisipasaun hodi kria kondisaun, Xefe Suku mesak labele, presiza ita hotu nia kontribuisaun. Ita esforsu hodi mantein ambiente moos no seguru i saudavel ba ita nia an no vizitante sira. Ofisialmente hau deklara ALFA iha Suku Vila Maumeta”.

Nai Xefe Suku Vila Mau-meta, Sr. Jesse Lopes Nobre Mouzinho, husu Xefe Aldeia sira tenke servisu maka’as atu nune’e ita nia moris labele haterus komunidade ho ita nia foer.

“Lolos ne’e ALFA ita deklara iha tinan kotuk, maibe tinan kotuk ita nia atividade barak liu, nune’e ohin mak ita foin deklara, buat sira ne’ebe ita tau laos ema ida nian, maibe ne’e ita hotu nian. Nune’e husu xefe Aldeia sira kontinua kontrola atu ita nia moris sosiedade labele terus ho ita nia foer”.

Deklara la’os rohan ba ne’e maibe husu komunidade sira atu kontinua servisu hamutuk hodi haree foer sira iha ita nia suku laran inklui tasi ibun sira.

Exelensia Prezidente Autoridade Observa Programa Merenda Escolar iha EBF Macadade

Exelensia Prezidente Autoridade Administrativa Ataúro, Sr. Mateus Belo, akompaña hosi Sekretária Asuntu Sosial i Oranizasaun Komunitária vizita Escola Baziku Filial Macadade hodi haree direita implementasaun Programa Merenda Escolar iha eskola refere. Iha terrenu nota katak Merenda Escolar la’o diak. Aproveita rekomenda mos menu balu tuir produtu ne’ebe komunidade Suku Macadade sira iha, atu nune’e bele apoiu tan ba Programa refere.

Ataúro, 24 Juñu 2025; Exelensia Prezidente Autoridade Administrativa Ataúro, Sr. Mateus Belo, vizita traballador sira ne’ebe hadia estrada diresaun Suku Beloi ba Suku Macadade.

Loron daruak Deziminasaun Kombate HIV & SIDA iha Suku Macadade

Macadade, 24 juñu 2025; Loron daruak Deziminasaun Kombate HIV & SIDA ne’ebe fasilita hosi Institutu Nasional Kombate HIV & SIDA ho tema “Mai ita hamutuk Proteze Timor-Leste husi Problema Tansmisaun virus HIV”.

Nai Xefe Suku Macadade, Sr. Jeremias Alves, husu kominidade sira atu toma atensaun hodi rona informasaun sira ne’ebe ita nia orador sira sei hato’o mai ita.

“Bem vindu ba Prezidente Autoridade no Prezidente Institutu Kombate HIV& SIDA, Sr. Daniel Marçal ho komitiva, husu komunidade sira atu rona didiak informasaun sira, tanba agora dezenvolvimentu hahu la’o buat barak sei mai, hein katak ita hotu fiar metin no tenke ba igreja hodi rona doutrina Maromak nian atu ita labele monu ba lasu diabu nian”.

Exelentissimu Prezidente Institutu Nasional Kombate HIV& SIDA, ami mai iha ne’e atu koalia ho ita bo’ot sira hodi prepara an.

“Ami fuan kontente ita bo’ot sira, ami mai iha ne’e iha buat ida mak interompe hela ami nia hanoin, tanba Ataúro potensia bo’ot ba setor Turizmu, ema barak sei mai no movimentu sira hahu lao makas, entaun ami mai atu koalia ho ita nia oan joven sira hodi hadia sira nia hanoin, lae ita sai hanesan rai seluk. Husu Joven sira hanoin futuru, labele hanoin kaben sedu”.

Exelensia Prezidente Autoridade Administrativa Ataúro iha nia breve palavra abertura, husu ita hotu proteje rai ne’e no ita oan sira nia futuru.

“Husu ita hotu proteje rai ida ne’e liu-liu ba ita nia oan sira, futuru rai ida ne’e atu sai diak presiza ita hotu tenke saúde diak, papel Autoridade nian atu asegura hodi kombate HIV & SIDA iha ita nia rai ne’e bele seguru nafatin, agora dadaun investor sira mai hakarak investe iha ita nia rai, ne’ebe husu ita hotu prepara an hodi simu”.

Komunidade ne’ebe partisipa iha sensibilizasaun ne’e mai hosi Aldeia Anartutu, Berau, Bite no Ilitimur.

Exelensia Prezidente Autoridade Abertura Sensibilizasaun Moras HIV & SIDA iha Suku Vila Maumeta.

Ataúro, 23 Juñu 2025; Exelensia Prezidente Autoridade Administrativa Ataúro, Sr. Mateus Belo, abertura sensibilizasaun Moras HIV & SIDA iha Suku Vila Maumeta ho tema “Mai ita Hamutuk Proteje Timor-Leste hosi Problema Transmisaun virus HIV”.

Nai Xefe Suku Vila Maumeta, Sr. Jessé L. N. Mouzinho, hato’o bem vindu ba orador sira ne’ebe sei fahe reseitas moris nian ba komunidade Suku Vila Maumeta.

“Em nome komunidade Suku Vila Maumeta hato’o seja bem-vindu ba orador nain lima ne’ebe sei fó reseitas moris nian ba ita, ita hotu hatene katak moras ne’e aimoruk la iha, maibé ita haree didiak aimoruk ne’e fasil mak kuidadu an no domin”.

Exelentissimu Prezidente Institutu Nasional Kombate HIV/SIDA, Sr. Daniel Marçal, ita kombate HIV ho liafuan laos ho aimoruk.

“HIV ita kombate ho liafuan, ita la kombate ho aimoruk, tanba aimoruk seidauk iha, ami mai atu fó hanoin oinsa atu taka dalan par labele transmite moras ne’e ba ita nia komunidade”. Husu ita bo’ot sira toma antensaun ba orador sira ne’ebe sei lori ita atu hatene oinsa atu prevene moras ne’e.

Exelensia Prezidente Autoridade Administrativa Ataúro, Governu iha komitmentu apoiu hodi kombate moras ida ne’e.

“Governu iha komitmentu hodi apoiu atu kombate moras ida ne’e iha ita nia rai, husu ita bo’ot sira atu atensaun didiak informasaun sira ne’ebe orador sira sei fahe mai ita. Agradese ba inisiativa Prezidente Institutu Kombate HIV/SIDA nian hodi tsu prioridade ba Ataúro hodi mai fahe informasaun ba ita nia komunidade”.

Iha Sensibilizasaun ne’e hetan partisipasaun masimu hosi komunidade suku Vila-Maumeta.

Papel Ministériu Sentral liu hosi Delegasaun Servisu Teritorial ba Autoridade Administrativa Ataúro atu lori Governu besik liu ba Povu.

Ataúro, 16 Juñu 2025; Ekipa Konjunta Ministériu Administrasaun Estatal ne’ebe lidera hosi Exelenstissimu Diretor Geral do Dezenvolvimento Local, Sr. Virgilio da Costa, hodi halo avaliasaun kondisaun mínimu Autoridade Administrativa Ataúro nian, ho tema ” Papel Ministériu Sentral liu hosi Delegasaun Servisu Teritorial ba Autoridade Administrativa Ataúro atu lori Governu besik liu ba Povu”,  ne’ebe hala’o iha Salão de Encontro MPC Ataúro.

Exelensia Prezidente Autoridade Administrativa Ataúro, Sr. Mateus Belo, agradese ba Diretor Geral do Dezenvolvimento ho ekipa ne’ebe mai ona hodi haree direita kondisaun real Ataúro nian.

“agradese ba Diretor Geral do Dezenvolvimento ho ekipa ne’ebe mai ona hodi haree direita kondisaun real Ataúro nian, Servisu Administrasaun nian la’o diak hela, agora dadaun Merenda Escolar la’o normal, PNDS lansa ona projetu loke estrada foun nian 3 agora la’o hela no PDIM iha prosesu hela hein katak tempu besik sei lansa”.

Exelenstissimu Diretor Geral do Dezenvolvimento Local, iha nia diskursu abertura, ami mai atu haree hamutuk kondisaun sira no hau sente kontente ho informasaun ne’ebe Prezidente Autoridade relata.

“Ami mai atu haree servisu sira ita bo’ot sira halo ne’e to iha ne’ebe ona no servisu sira ne’ebe Governo Central fasilita formasaun sira ba ita bo’ot sira ne’e halo to’o iha ne’ebe ona, agora dadaun tama ona ba tinan 2025 ita la’o ona fulan ne’en, ita hotu hatene produtu saida mak ita produs iha fulan ne’en hau apresia ohin Prezidente Autoridade informa ne’e progresu diak, ita hakarak mak ida ne’e”.

Atividade ne’e sei hala’o durante loron tolu inklui ajenda vizita terrenu sira hodi haree direita progresu servisu fiziku sira ne’ebe dadaun ne’e la’o hela.

Partisipa iha atividade ne’e Exelensia Prezidente Autoridade rasik, Kargu Diretores, Xefe Dpartamentu, Xefe Suku, Pontu Focal, Delegasaun Teritorial, Dirijentes Edukasaun no Funsionariu Autoridade Administrativa Ataúro.

Exeléntissimu PAA-Ataúro Partisipa Reuniaun Jornada Orsamentál 2026.

Dili-13 Juñu 2025; Exelentissimu Prezidente Autoridade Administrativa Ataúro Akompaña hosi Sekrétaria Administrasaun no Finansas, Sekrétario Investimentu Dezenvolvimentu Integradu, Diretor Servisu Ajensia Planeamentu no Diretor interino Finansas i Patrimóniu Logistik Partisipa Reuniaun Jornada orsamentál 2026 ho tema “Optimiza Rezultadu ho Despeza ne’ebe realistiku” iha salaun Auditorium Kay Rala Xanana Gusmão Ministériu Finansas, Dili.

Reuniaun refere lidera hosi Sua Exelensia Primeiru-Ministru (PM), Kay Rala Xanana Gusmão, no hetan partisipasaun másimu hosi Membru Governu Konstituisionál Da-9, Reprezentantes Parlamentu Nasionál, Autoridades Munisípiu no Ajensia Autónoma Sira.