Deklarasaun Area La Soe Foer Arbiru (ALFA) iha Suku Vila Mau-meta.
Vila Mau-meta, Kuarta Feira, 25 Juñu 2025; Suku Vila Mau-meta ho ninia Aldeia tolu (3) mak hanesan Aldeia Eclae, Aldeia Ilimanu no Aldeia Ileticaraquia, ho total uma kain 492 ho populasaun 2149. Total deklara katak Komunidade Suku Vila Mau-meta livre ona hosi Area La Soe Foer Arbiru (ALFA), sei mantein nafatin no mellora diak liutan tuir posibilidade komunidade.
Xefe Departamento de Gestão de Programas de Saúde, Sra. Agustinha da Costa Gomes, kongratula komunidade Suku Vila Mau-meta tanba bele deklara ona ALFA.
“Parabéns ba ita hotu tanba bele deklara ona ALFA iha Suku Vila Mau-meta, parte Saúde kuandu soe foer arbiru, foer ne’ebe ita soe sei lori fali moras mai ita, tanba ne’e agradese ba ita hotu iha nia servisu hamutuk hodi deklara ALFA. Husu mos ba ita hotu atu kuidadu ita nia ambiente, tenke hamos ita nia uma hun sira par ba oin ita nia ambiente kontinua moos”.
Exelensia Prezidente Autoridade Administrativa Ataúro, Sr. Mateus Belo, felisita komunidade Suku Vila Mau-meta, tanba ida ne’e sai momentu importante.
“Momentu importante ba Suku Vila Mau-meta ne’ebe marka tan pasu ida hodi deklara ALFA, esforsu sira hotu la fasil, maibe ita nia servisu hamutuk no partisipasaun hodi kria kondisaun, Xefe Suku mesak labele, presiza ita hotu nia kontribuisaun. Ita esforsu hodi mantein ambiente moos no seguru i saudavel ba ita nia an no vizitante sira. Ofisialmente hau deklara ALFA iha Suku Vila Maumeta”.
Nai Xefe Suku Vila Mau-meta, Sr. Jesse Lopes Nobre Mouzinho, husu Xefe Aldeia sira tenke servisu maka’as atu nune’e ita nia moris labele haterus komunidade ho ita nia foer.
“Lolos ne’e ALFA ita deklara iha tinan kotuk, maibe tinan kotuk ita nia atividade barak liu, nune’e ohin mak ita foin deklara, buat sira ne’ebe ita tau laos ema ida nian, maibe ne’e ita hotu nian. Nune’e husu xefe Aldeia sira kontinua kontrola atu ita nia moris sosiedade labele terus ho ita nia foer”.
Deklara la’os rohan ba ne’e maibe husu komunidade sira atu kontinua servisu hamutuk hodi haree foer sira iha ita nia suku laran inklui tasi ibun sira.